Бу актрисани Болливуд киносининг ашаддий мухлислари яхши билишади. Болливуд киноюлдузи Димпл Кападиянинг «Бобби» фильмидаги роли уни бутун дунёга машҳур қилди. Ўтган асрнинг 70-йилларида «Бобби» фильми кинохитга айланди. Димпл Кападиянинг Риши Капур билан ижодий тандеми миллионлаб киномухлисларни ҳайратга солди. Ўша-ўша актриса Димпл Кападияни «Бобби» деб сийлашади. Болливуд киноюлдузи Димпл Кападия «Олтин гепард» Тошкент халқаро кинофорумининг меҳмони бўлди. Бу эксклюзив интервьюни «Даракчи» учун хонанда ва актёр Отабек Муталхўжаев уюштирди.

Отабек Муталхўжаев: — Ўзбекистонда сизни «Бобби» фильми орқали яхши билишади. Бу қаҳрамонингиз ҳаётингизда қандай ўрин эгаллайди?

— Мен Ўзбекистонга ташрифимни интизорлик билан кутдим. Мана, орзуимга етдим. Ота-онам менга Димпл, деб исм қўйишган эди. Буюк кинорежиссёр Раж Капур эса мени ўз фильмида "Бобби” деб атади. Ва, бу исм менинг бутун умримга татигулик бўлди. Фильмнинг оламшумул шуҳратидан сўнг кўпчилик бизни Риши Капур билан турмуш қуришган, деб тахмин қилган эди. Биз Риши билан «Бобби» фильмидан сўнг дўстона муносабатларни сақлаб қолдик. Лекин ҳаётда ҳар биримизнинг ўз оиламиз, фарзандларимиз бор. Ўзбекистон буюк устозим Раж Капурга чексиз қувонч ва бахт ато этган эди. Бу бахт менга ҳам насиб этди. Кинофорумга ташрифим таассуротларга ва ҳис-ҳаяжонларга тўла бўлди.

— «Бобби» фильмидан кейин Риши Капур билан бошқа фильмларда ҳам суратга тушдингизми?

— Мени ҳалигача "Раж Капурнинг қизи” дейишади. «Бобби» фильмидан кейин актёр Риши Капур билан кўплаб фильмларда суратга тушдим. Охиргиси «Севишганлар» деб номланган фильм. Бу икки севишган қалб ҳақидаги ажойиб мелодрама эди. Шунингдек, ижодий фаолиятимдаги бир нечта фильмда куёвим Акшай Кумар билан ҳам бирга роллар ижро этдим.

— Айни кунда нималар билан бандсиз?

— Ҳозир кинодаги фаолиятимдан ташқари, ҳунармандчилик санъатига ихлос қўйганман. Биллур шамдонлар ясайман. Тасвирий санъатга ва мусиқага қизиқаман. Баъзи-баъзида фильмларда суратга тушсам-да, асосий вақтимни иккита шириндан-шакар набираларим билан ўтказаман. Улар менинг жону дилим.

— «Олтин гепард» Тошкент халқаро кинофоруми ҳақидаги фикрингиз?

— Тошкент халқаро кинофоруми дунё санъат аҳлини бирлаштирадиган катта лойиҳа.Art week style.uz эстетик жиҳатдан гўзал маросим. Бу каби лойиҳаларда иштирок этмаган эдим. Миллий ҳунармандчилик, каштачилик, зардўзлик, меъморчилик каби санъат намуналарингиз мени ҳақиқий маънода ҳайратга солди. Art week style.uz доирасида ўтказилган намойишлар ва кўргазмалар ўтмиш ва замонавийликнинг жозибали уйғунлашуви намунасидир. Мен ўзимни гўзаллик оламида ҳис этаяпман.

Интервью сўнгида болливуд юлдузи Димпл Кападия суҳбатдошининг ҳинд киноактёри Саиф Али Хонга ўхшашлигини таъкидлаб ўтди. Ва таклиф ҳамда имконият бўлса, ўзбекистонлик ўхшаш чеҳра билан бирга фильмда суратга тушишини айтиб ўтди. Ўзбек йигитининг севгилисини ўйнай олмаса-да, ҳар қалай онаси образини ижро этажагини таъкидлади. Болливуд киноюлдузи Димпл Кападия ўзбек томошабинларига ҳамон севимли, ҳамон қадрли. «Бобби» фильмидаги севги туғёнлари фильм қаҳрамони Боббининг пок, беғубор туйғулари гўзал қиёфаси ҳамон томошабинларимизни ҳайратга солади. Демак, Бобби ҳамон биз билан бирга…