"Форбс” журналининг бу йилги рейтингига кўра, франциялик ишбилармон Бернар Арно Европанинг энг бадавлат кишиси, дунёнинг эса 4-рақамли миллиардери деб топилди. Унинг бойлиги 41 миллиард долларга баҳоланган. Хўш, Бернар Арнонинг бундай мартабага эришиши қандай омилларга бориб тақалади? Саҳифамизда шу ҳақда ҳикоя қиламиз...

Америка сабоғи

Бернар Арно 1949 йилнинг 5 март куни Франциянинг Рубе шаҳрида туғилди. 1971 йилда Париждаги энг нуфузли даргоҳлардан бири —политехника олий ўқув юртининг муҳандислик бўлимини тамомлади. Дипломини қўлга олган Бернар ўз соҳасида узоқ вақт ишламади. Рубе шаҳрига қайтиб, отасининг "Феррет-Савинел” қурилиш фирмасида фаолият юрита бошлади. Аммо бундай ишдан кўнгли тўлмайди ва у янги марраларни эгаллашга қарор қилади. 1981 йилда АҚШга йўл олади. Флоридада "Ferinel Inc” фирмасини очиб, 3 йил давомида тадбиркорлик билан шуғулланади. Бу ерда ҳам ўзи истаган натижага эришолмайди, бироқ у уйга америкалик тадбиркорлардан муҳим, тажриба-фойда чиқадиган компанияларни забт этишни ўрганиб қайтади.

Орзу томон дадил қадам

Ватанига қайтган Арнонинг эътиборини ўша пайтда инқирозга юз тутган "Boussac” тўқимачилик компанияси тортади. Компания таркибига бошқа брендлар қаторида Christian Dior модалар уйи ҳам кирарди. Оилавий бизнесини 15 млн. долларга сотган Бернарга яна 80 млн. доллар керак бўлади. Тадбиркор "Lazard Freres” банкига йўл олиб, банк раҳбариятини ушбу кредитни беришга кўндиради. Мақсадига етишиш учун ҳамма воситаларни ишга солади. Ҳатто, "Boussac” компаниясининг ҳиссадорлари орасида биринчи рафиқасининг қариндошлари борлигидан фойдаланиб, акцияларнинг катта қисмини "таниш-билишчилик” қилиб қўлга киритган. Франция ҳукуматини "Boussac”ни тиклашга ишонтириб, компанияни қўлга киритган тадбиркор аслида соҳани ривожлантиришни эмас, компания активларини аста-секин нақд пулга айлантириб фойда кўришни мақсад қилади. Лекин, буни қаранг-ки,мода оҳанрабодек Арнони ўз оламига тортиб кетади.

Бернар Арно қимматбаҳо, энг нозик таъбга ҳам "лаббай?” деб жавоб берадиган буюмлар ишлаб чиқариш ғояси билан "ёнади”. Буни амалга ошириш учун 1988 йилда энди одимлашни бошлаган Moet Hennessy Louis Vuitton (LVMH) компанияси акциялари ва бошқа кичикроқ, аммо келажаги бор фирмаларни сотиб олишни бошлайди. Шу тариқа Бернар Арно 1989 йилда қимматбаҳо шароблар, мода либослари, косметика каби люкс товарлар савдоси билан шуғулланадиган фирмаларни ўзида бирлаштирган дунёдаги энг катта компаниялардан бири LVMH холдингнинг президентига айланган. У майда мода уйлари даврини якунлаб, бу секторни LVMH йирик холдинг саноатига айлантирди.

LVMH — дунёнинг энг йирик модалар империяси

Бернар Арнонинг бошқа фирмаларни сотиб олиш эвазига доирани кенгайтириш ғояси асосида LVMH бугунги кунда дунёдаги энг йирик холдинглардан бирига айланган. Бу улкан компания тайёр маҳсулотлар ишлаб чиқаришга ихтисослашган "Kenzo”, коньяклари билан машҳур "Hennessy”, шунингдек, "Donna Karan”, "Givenchy”, "Zenith” каби 60 дан зиёд ширкатни ўзида бирлаштирган. Шу йилнинг ўзида Италиянинг қимматбаҳо тошлар билан савдо қилувчи "Bulgari” компаниясининг 50,4 фоиз акциясини 3,7 миллиард евро эвазига сотиб олди.

Дунёнинг турли бурчакларида LVMHга қарашли 2468 та савдо марказлари мавжуд. Хошимин (Вьетнам), Пномпен (Камбоджа), Екатеринбург (Россия), Абу-Даби (БАА) шаҳарларидагилар шулар жумласидан. Хитойнинг ўзида 35 та бундай маркази бор.

Бернар Арно LVMH, "Christian Dior SA” компанияларининг раҳбари бўлиш баробарида кимошди савдоси ширкати бўлмиш "Phillips de Pury & Company”нинг ҳам раҳбаридир.

"Янги иш бошлаган тадбиркорларга доим бир гапни айтаман: миллиард ишлаб топиш учун чўнтакда миллион бўлиши шарт эмас. Фақатгина пули бор одамларни ҳақиқатда жалб қила оладиган маҳсулот ёки хизмат турини ўйлаб топсангиз бўлди. Шунда қаршингизда майда-чуйда хизматлардан кўра минг баробар кўпроқ фойда келтирадиган эшиклар очилади”.

"Даракчи” маълумотномаси

*LVMH концернда бугун 70 мингдан зиёд мутахассис фаолият юритмоқда.

*Бернар Арно 2007 йилда "Time” журнали томонидан эълон қилинган "дунёнинг энг обрўли 100 кишиси” рўйхатидан жой олган.

*Бернар Арно икки марта турмуш қурган, биринчи турмушидан икки нафар, иккинчисидан уч нафар фарзанди бор. Катталари Дельфина ва Антуан дўконлар фаолияти ва жамоатчилик билан алоқалар учун жавоб беради. Кичик ўғиллари Александр, Фредерик ва Жан ҳам болаликдан оилавий бизнес сир-асрорларини ўрганмоқда.

*Тадбиркор кейинги пайтларда ўзини Европа интернет бозорида ҳам синаб кўрмоқда. Жумладан, шу соҳага ихтисослашган янги компаниясига ярим миллиард доллар сармоя киритди.